ان فرقتنا الايام تجمعنا الذكريات

لا تسير الحياة الا بالحب

الأربعاء، نوفمبر ٢٩، ٢٠٠٦

بين اختيار الفتاة لشريك حياتها واختيار الاهل......قضية اجتماعيه


فى الزمن الماضى كان الاهل هم من يختارون الزوج الذى يرونه مناسبا لابنتهم ، ولم يكن للفتاة اي رأي اما اليوم فقد اصبحت الفتاة هى التى تختار شريك حياتها حسب قناعاتها هى لا قناعات الاهل


ومقارنه بين الماضى والحاضر ، نجد ان نسبة الطلاق كانت متدنيه ان لم تكن منعدمه فى الماضي ، اما الان فان نسبة الطلاق مرتفعه جدا.

ما السبب ؟؟

شنو انتو رايكم في هالموضوع هل انتو اتشوفون ان اختيار الاباء ازواج بناتهم افضل كونهم اصحاب خبره وتجارب في الحياة ويعرفون الرياييل واختيارهم يكون مبنى على حسابات تكون في صالح بنتهم ام ان يكون اختيار البنت لشريك حياتها تكون اهيا الطريقه الافضل بحيث انها الي راح تعيش معاه مو اهلها ؟؟

ملاحظه : هذدا الموضوع منقول من الجريده وحابه اخذ رايكم فيه

33 Comments:

Blogger 78o8eYa said...

حلو الموضوع :)

عجبني حقوق الاقتباس المحفوظة ، أي جريده كاتبه عن هالموضوع ؟
^_*


أعتقد إن ارتفاع نسبة الطلاق لا ترجع لكون الإختيار كان من أي طرف ، الأهل أم البنت بنفسها

لكنها نتيجة للإختيار الخاطيء و المتسرع من قبل الطرفين على حد السواء

..

أؤمن بأن الأهل لهم الحق في المشاركة بالإختيار ، كونهم أكثر خبرة و دراية بالحياة و لهم نظرتهم في تقييم الشخص المتقدم

مع عدم التقليل من أهمية رأي البنت ، لأن هذا الموضوع خاص فيها و تترتب عليه حياتها المستقبلية


أحياناًً يتسرع الأهل بتزويج بناتهم رغبة في الستر ، ويكون الإختيار المتسرع نهايته ورقة طلاق تكلف البنت الكثير لعدة أسباب أبرزها عدم التكافوء .. اللي كان واضح جداً
..
أو بسبب عدم نضج البنت اللي يأهلها لتحمل مسؤولية الزواج و أعباءه

في ناس وايد مفهمين بناتهم إن الزواج وناسه ، طلعات و سفرات و كل اللي تبينه بيسويه لج
يقصون على اليهال و يزوجونهم و عقب ما تطيح الفاس بالراس قالو ما نبي ، طلقونا
!

بالمقابل في شباب مو كفو زواج .. عادينها مرحلة و تجربة عابرة ، كونهم ما راح يخسرون شي
يجربون و بعد ما يكتشفون إنهم مو قده بكل بساطه طلقو
!

وما ننكر إن في أهل يسعون لطلاق بنتهم
بدال ما يحاولون يصلحون بين الزوجين على طول قالوله ، ما تستاهل بنتنا


من جانب آخر ، اختيار البنت يكون نابع من قلبها
وليس عن طريق العقل

وهالقلب ياما ودّر ناس

وبعد الزواج تكتشف الحقيقة المره ، لكن شعقبه ؟ ..

الحجي وايد بهالموضوع
..
آنا أشوف إن زواج البنت قرار مشترك ، بينها و بين أهلها
وهالقرار ما يخضع للقلب
يبيله عقل يفكر فيه بركاده و سنع

والله يوفق الجميع و يكتب لهم خير ما في غيبه

:)

٨:٠٨ م  
Blogger 78o8eYa said...

بغيت أسأل ، بلوقج ماتن .. ياي بالعرض

كل هذا من الصوره وإلا إنتي مسويه فيه شي
؟
;p

٨:١٢ م  
Blogger Unknown said...

والله يا اختى العزيزة اللى اقوله ان الطلاق صار حلاو لان لا الحريم حريم ولا الرياييل رياييل الموضوع صار مصخرة ماكو تحمل حق المسؤولية
من جانب الرجل
ولا سنع ومعرفة واجبات الزواج من قبل المرأة

١١:١٧ م  
Blogger Cr8ivia said...

قبل اذا الحرمه ما عجبها الريال و الا شافت عليه شي بتنجعم و تسكت .. لا اهلها بيرضون على الطلاق و يوقفون وياها و لا الريل اذا طنقرت و الا زعلت بيعطيها ويه و الا بيطلقها

الطلاق كان جريمه نكراء .. و حتى لو الريال فيه ظيم الدنيا اهل الحرمه بيقولون ظيم الريل و لا عار الطلاق .. فقعدي و تحملي و صبري و ان شاء الله يتعدل و هذا نصيبج و خلاص
فحتى فكره الطلاق شي غير وارد يعني في بال اي حرمه الا فيما ندر و عسر

الريال ان ما عجبته حرمته قبل بالطقاق غصبن عليها تسوي اللي يبيه و قاعده بالبيت تربي العيال و يروح يحط عليها ثانيه و ثالثه و رابعه و الا يسافر يوسع صدره و يلها بهالدواوين و الاشغال يعني مو فارقه معاه

اما الحين لا الوضع اختلف .. الطلاق ما عاد عار .. و المره صار لها صوت و كلمه و حق ..
و الظروف تغيرت و غيره و غيره و غيره

و ما انكر ان الانفتاح الزايد هالايام و الاختيارات المتسرعه و التعارف اللي يبنى على غلط سبب رئيسي للطلاق و زيادته .. ناهيك عن الترف و الدلال و قله الاحساس بالمسئوليه

٢:٥٨ ص  
Blogger loco said...

walla ana agool el zawag qesma wa na9eeb ! wa beed el rayal wa el mara enhoom ekammloon ba3ath wa emashoon nafshoom eb hal denya eb 5eer ! la tgoolooly el rayal keela '3ala6 ! walla el mara keel '3ala6 ! no ana ashooof ena ba3th el a7yan el 6alaq 7al monaseeb 7ag mashakeel 3aweee9a !fa enshalla neelga el mara el san3a wa enkamel bagy 7ayatna ma3aha eb 7ob wa sa3ada ! fa keel hatha qeeesma wa na9eeb!

١٢:٢٨ م  
Blogger tasty_as_berry said...

السلام عليكم :)

والله الاحصائيه هاذي صحيحه .. يمكن علشان الحياة قبل كانت بسيطه وما فيه وعي ... والاشخاص ما عندهم شهادات وعلى قدهم ..

لكن امهات قبل ترى تحملوا ضيييم وقهر .. بس ما يقدرون يتكلمون .. ويدورون الستر ..

لكن في وقتنا هذا إذا عندي أهل عايشه عندهم معززه مكرمة شاللي حادني اتحمل الضيم والقهر ..!!

ولو كانت الفرص متاحة ايام قبل .. كانت تغيرت اشياء كثيره ..

أول ماكو سفر ولا تلفزيون وفيديو ووووو لو بنتكلم في هالأمور ما نخلص ..

وكلا توفيج من الله .. سواء من اختيار الأهل او البنت ..

تحياتي لج :)

١٠:١٢ م  
Blogger physio-80 said...

انا برايي ان رأي البنت مهم جداً كونها الشخص اللي راح يتزوج مو الأهل ولكن، رأي الأهل أهم لأن البنت شنو عندها من خبرة و تجربه بالحياة؟؟؟

الأهل لما يختارون لبنتهم يختارون على اسس معينه و مدروسه ممكن نتيجة أخطاء قديمه أو قصص قديمه، فيختارون لتجنب الوقوع بالأخطاء مرة ثانية

وسلامتكم

٩:١٠ ص  
Blogger SAJA.S said...

لا لا لا لا لا .. البنت هي اللي لازم تخناره .. مو قصدي ان التعرف على واحد وتقول حق اهلها يلا زوجوني اياه .. قصدي ان الخاطب ايي .. وتقعد معاه البنت ان شاء الله عشر مرات .. بس لا زم هي اللي تختار اذا ابي والا لا

وبعدين على ايام اول .. في بنات هي اللي تختار .. يعني شوفي الفريه .. هي اللي اختاراه وخذته

١٢:١٥ م  
Blogger Alather said...

السلام عليكم ورحمة الله وبركاته..

موضوع أو تساؤل أول مرة ينطرح أمامي :)

باعتقادي ان سبب تزايد حالات الطلاق لا يرجع لاختيار البنت لشريك حياتها ..

ولكن لو فرضنا ان تقدم شاب لخطبة احدى البنات .. وكانت مشورة الأهل بأنه خوش واحد .. البنت تقرر .. اكيد يدخل بالموضوع راي الاهل سواء الرفض او القبول ..

ومثلا االاهل راضين والبنت رافضة .. ما يكون هناك غصب يعني ما يغصبونها .. طبعا اتكلم عن العوايل الديموقراطية وليس التعسفية اللي تغصب البنت ..

أما الاسباب فاعتقد ترجع لعدم الخبرة الحياتية بموضوع الزواج ..
ما تكون البنت او حتى الشاب ملم بفكرة الزواج ولا يعرف عنها سوى الاقتران بشريك وخلاص

لا ثقافة زوجية .. ولا فن في التعامل .. وحتى فكرة انه الحياة ستختلف مو موجودة ..
ولا يعرفون انه الزواج عبارة عن رابطة حب والمودة وانشاء أسرة ..

١٢:٣٨ م  
Blogger kuwaitia said...

78o8eYa: هاذى جريدة ملحق الوطن يوم 26/11

كلامج صح بان الاختيار السريع يكون

احيانا سبب للطلاق

١:٥٥ م  
Blogger kuwaitia said...

78o8eYa: :)) عدلتلج الصوره صح كانت

امتنه البلوق

mishari: صح والله يامشارى لانه ماكو

تحمل للمسؤوليه كل واحد يقط المسؤوليه

على الثانى

Cr8ivia: اول صح كانت المرا بتنجعم

لانه كان الطلاق جريمه وكله المرا في

عينهم انها غلطانه

١:٥٨ م  
Blogger kuwaitia said...

loco: احنا ما نقول ان الريال كله غلط

ولا المرا كله غلط لا صح اهمه يكملون بعض

بس انا اقول ليش الطلاق نسبته زادت
:)) حياك بعد هالغيبه

٢:٠٠ م  
Blogger kuwaitia said...

tasty_as_berry: صدقتى والله الحريم اول

تحملو الضيم والقهر لانهم صج يبون الستر

لانهم ماكانو عندهم شهادات او يشتغلون

physio-80: انا معاك في انه البنت

رايها اهم وبعد راي الاهل مهم :))

Smile: شي طبيعى انه البنت اهيا الي

تختار بس اول الطلاق اقل من الحين شنو

السبب في نظرج

Alather: صح لسانج في كل كلمه قلتيها

لانه مافي وعى للمتزوجين ولا احد يعرف واجباته
مثل ما يعرف حقوقه

٢:٠٥ م  
Blogger May said...

أنا من رأيي

رأي الوالدين يأتي في الصدارة

/* في أغلب الأحوال */

لأسباب كثيرة

منها أنهم مرّوا بتجارب وخبرات عديدة

ولهم نظرة بعيدة المدى

ويعرفون بإذن الله الأصلح والأنفع لبنتهم

أما رأي البنت

فغالباً ما تحكّمها العاطفة

ونظرتها محدودة

تربط حياتها ومستقبلها كله عشان كلمة "أحبك" ممكن في أي لحظة تروح

لكنه في الوقت نفسه رأي البنت مهم

هي اللي في النهاية بتتزوج

يعني

بعد ما يوافقون الأهل

هي لها الخيار

إذا ارتاحت له وحست أنه في قبول من الطرفين

وقتها نقول

مبروك :)

٢:٢٢ م  
Blogger 78o8eYa said...

شاكره لج توضيح المصدر و تعديل الصوره
:)

٧:٣٠ م  
Blogger سالفة قلب said...

طبعا البنت لازم يكون لها رايها الخاص

مع توجيه الاهل لها لمعايير الاختيار



تحياتي لج

٧:٥٠ ص  
Blogger Engineeroo said...

موضوع حلو، في الماضي كان الوضع بين الزوجين مختلف. لازوجة مطيعة لزوجها، و الزوج هو رجل البيت و اللآمر الناهي في المنزل. في وقتنا الحالي و مع مساوات المرأة بالرجل جعلت المشاكل و حالات الطلاق ترتفع بنسبة واضحة.
الأمر الثاني هو ضعف الوازع الديني في هذا الزمان. هناك طرق كثيرة أشار إليها ديننا الحنيف في مسألة التعامل بين الزوجين.

و إنشاء الله أتطرق لهذا الموضوع في بلوقي

٩:١٤ ص  
Blogger Q8-Rainbow said...

والله مادري بس اتوقع نسبه الطلاق كانت قليلة لان الناس كانو محترميييييين والريايل يخافون ربهم بزوجاتهم والمرأه كذلك

اما الحين تدرين شلون صايرين البنات والشباب
وترا رأي البنت مهم لأنها راح تعيش مع هالشخص مو أهلها فلازم تتزوج واحد ثقه
والريايل لازم ينقون البنيه اللي يبيها لان الحين قام ينخاف من الزواج

وشكرا

٢:١٢ م  
Blogger kuwaitia said...

سالفة قلب : صح اهو راى البنت الاساس

بعدين راي الاهل


Engineeroo: صح كلامك مع مساواة الرجل بالمرأه وقلة الوازع الدينى هاذا

بعد اسباب تؤدى الي الطلاق

٢:٤١ م  
Blogger kuwaitia said...

q8_boy: البنت اهيا الي لازم اتنقى

الزوج صح كلامك طبعا مع توجيه من اهلها

٢:٤٣ م  
Blogger kuwaitia said...

MiaMi: راي الوالدين لما ايي بالصداره

يكون في اخلاق الزواج عموما يعنى لما

يسألون عنه ويشوفونه زين اوكى هاذا

ضرورى في اختيارهم بس بعدين يكون دور البنت في الموافقه او الرفض

٢:٤٩ م  
Blogger kuwaitia said...

78o8eYa: العفو حبيبتى انتى تامرين

:))

٢:٥٠ م  
Blogger حسام بن ضرار said...

:ماني صاير متحيز بس الحق بقوله


وايد من البنات اللي يتطلقون هالسنين مو كفو زواح ولا حتى كفو مسؤولية

صارت كلمة "طلقني" مثل طقة العلج عندهم

:والعذر
والله اهو خوش ريال واهله والنعم فيهم بس ماني شايفه روحي معاه

ولا

اكتشفت اني توني صغيرة عالزواج

أو

نحترم بعض بس احاسيسنا مو منسجمه

يخرب بيتكم
صج دلاليع و مو كفو

للأسف
البطون ما قامت تجيب حريم نفس حريم أول

٨:١٢ م  
Blogger kuwaitia said...

حسام بن ضرار: كلامك صراحه مافى زعل

وكلمة الحق المفروض الواحد مايزعل منها

وانا ما الومط على الكلام الي قلته لانه

في وااايد بنات جذى بس الواحد ما يعمم

في والله وايد بنات والنعم فيهم وفي

تربيتهم وحتى الريال بعد مو مثل رياييل
اول حتى الر يال ماقام يتحمل المسؤوليه

يعنى من المرا والريال

وفي وايد بنات اطلعو مثل امهاتهم كل السنع فيهم

٩:٥٩ م  
Blogger حسام بن ضرار said...

لا اكيد ما اعمم

بس الغالب على اسباب الطلاق هالامثله اللي قلتها

ولا فيه بنات ما يخلون من السنع والفهاميه وخوات رجال مثل ما يقولون

١٠:٤٩ م  
Blogger kuwaitia said...

حسام بن ضرار: اي والله في بنات والنعم

فيهم والله يهدى الجميع

Hitman1: انا مو معاك ان من اسباب

زيادة الطلاق اهوه صعوبة الحياة من

وجهة نظرى انا اهوه بناتنا ورياييلنا

ما قامو يتحملون المسؤوليه ولا اهمه

يعرفون واجباتهم مثل ما يعرفون حقوقهم

١٠:١١ م  
Blogger allfollowsome said...

الناس واخدة الموضوع تهريج مفيش اى التزام

يعنى هم يحبوا بعض والاهل يجوزهم وفى الاخر يتخانقوا وينفصلو على سبب هايف

الحب والاختيار محتاجين معاهم تحمل مسئولية

٥:١٦ م  
Blogger barrak said...

بصراحه لايوجد لدي تعليق ولكني استفدت من التعليقات والردود
شكرا

٢:٣٧ م  
Blogger الاء سعود المجيبل said...

تبين الصج نسبة الطلاق متزايدة بسبب الدلع من الطرفين @@

وكل واحد شايف نفسه على الثاني ....وحده حبت لها واحد من اول والا ثاني شهر قالت خلاص ابي اتزوجه !! هااااااااااااااو @@

اعرف وحده والله من اول يوم عرفتها فيه واهيا تسولف لي عن اخياس ريلها مع اني ما اعرفها ؟؟؟؟ مرة وحده اسالتها ليش تزوجتيه دام مو عاجبج ؟؟؟ انجعمت !!

بس اللي اعرفه ان اهوا ولد رفيجة امها شافوها واخطبوها ووافقت على طول ؟؟؟


هااااااااااااو انزين بس عشان اهوا ولد رفيجة امي آخذه ..؟؟؟ انزين قعدي وياه شوفي شنو اطباعه ولو تعرفين شوي منها امبيييييييييه @@

صج البنت احسها صااابره وااايد مع واحد مو كفو والله يهديه عشان عيالها



المشكله بالاختيار والتسرع ..... لان هالشيء كبير مسئولية كبيره يبيلها تفكير مو اسبوع والا اسبوعين خلاص اقول الجواب !!

١٠:٢٤ م  
Blogger سالفة قلب said...

حبيت اسلم

فاقدينج من غير شر

٩:٤٣ م  
Blogger kuwaitia said...

سالفة قلب : ماتفقدين غالى يا بعد قلبي

١٠:٢٦ م  
Blogger lawyer said...

فعلا كلامج و تساؤلج وايد حلو
افكارج حلوه

قاعده افكر فيها بس مالقيت اجابه

٩:٠٨ م  
Blogger kuwaitia said...

lawyer: كافى مرورج حبيبتى اسعدنى

١٠:٥٤ م  

إرسال تعليق

<< Home